次世代生活圈：浪客‧行

那天，他穿起波鞋，提着相機出了門。他走過人來人往的鬧市，踏過渺無人煙的荒涼之地，從白晝走到黑夜。豁出去漫遊，在香港浪蕩，這就是80後的浪漫。

如果有朋友跟你說：「不如聽日由將軍澳行去元朗？」你的反應可能是：「搭港鐵定巴士？」、「講笑咋？」或「傻o架？點行呀？」但榮仔卻真的做了。

重新認識社區

普通不過的80後，完成這件瘋狂非常的事，榮仔不是受了甚麼刺激，而是希望尋找自己的意義，「二月嗰陣辭咗工，為咗盡快搵番份工，等身邊人放心，我每日就不斷上網搵工，連門口都無出。」直至第十天，他忽然想，「唔通呢啲就係我每日應該做嘅嘢？」於是他決定出一趟「遠門」，從居住的將軍澳，徒步走到新界的另一邊─元朗。

旅程的收穫遠比想像的多，他到過大部分人未曾涉足之處，亦能以全新角度，重新審視以為熟悉的地方，「好似順利邨，每日搭車都經過，但當我置身其中，先發覺呢個地方，同我諗嘅完全唔同。」滿滿一街，晾曬着棉被，還混集鹹魚、菜乾的氣味，老人們休閒地坐着，他好像走進另一個世界，一個想像以外的世界。

至今榮仔已遠征四次，每段歷時最少十小時，他不但以相機記錄，更放上社交網站及討論區分享，「睇番啲相，覺得自己完成咗件好似好難嘅事，真係好有滿足感，亦都彷彿搵到自己嘅意義。」他認識到志同道合的朋友，準備同征服更難更遠的路。年輕人，起動吧！