政壇：搞搞政：長霸區會議席黨友夾擊阿謙

建仔一直都提倡讓年輕新一代上位，但有部分議席長期被黨內老臣子霸住，遲遲都冇換人迹象，其中該黨黨團召集人葉國謙，如無意外會第三次循區議會界別競逐連任。

何漢文欲引發討論

為打破呢個政治悶局，有黨友願意企出嚟挑戰阿謙，挑戰者就係黃大仙區議員何漢文，據聞至少有十幾名區議員撐佢。何漢文本身係東九龍居民委員會主席，該會一直心思思染指立會議席，只係未搵到合適機會小試牛刀。何漢文證實確有意思想參選，但強調唔係志在個位，反而最想引起黨內討論，因為冇理由一個人可以做三屆咁多喎！

此外，據聞該黨新界區好多兄弟都蠢蠢欲動想推舉代言人參選，當中以「票王」北區區議員劉國勳嘅呼聲最高，最主要係睇中佢知名度較高，加上地區工作紮實。咦！咁阿謙咪畀黨友左右夾擊？

不過，劉國勳話感謝各位兄弟嘅厚愛，但強調自己從來冇諗過喎，重申至今都冇人搵過佢，佢亦會以大局為重，唔想造成任何矛盾。