政壇：90後籌組全港學生會
依家唔可以再話年輕人有政治冷感，事關有十五個志同道合嘅90後組織咗一個叫做香港中學生聯合委員會嘅團體，佢哋嘅志向係喺五年內成立一個香港學生會，核心成員要係全港中學生普選出嚟，話咁至夠代表性，日後可以同政府談判咁話。
普選學生會嘅概念係嚟自十九歲嘅Alfred林曦，佢係赤柱聖士提反書院嘅「末代高考生」，半年前考生最忙碌嘅時候，佢情願放低書本，仲捐埋成副身家做起動資金，目的都係想幫學生發聲。
另一個成員Heywood陳俊塱話自從○三年同父母上街之後，明白政府施政真係好混亂，作為90後都要爭取發聲，唔好做橡皮圖章。
林曦（左二）同陳俊塱（右二）爭取學生可以同政府談判。