政壇：白鴿唔夠票勢輸凸

今屆立法會選舉新增五個區議會超級議席，工聯會一早就決定採用「風車策略」，由區選「票后」兼立會前議員陳婉嫻出戰，希望借佢嘅高知名度，拉高工聯會五區候選人嘅得票。原定派出「一強一弱」迎戰超級區會嘅建仔，其後亦決定改以「雙強陣」應戰，派出兩名副主席兼現任立會議員劉江華同李慧琼出戰，希望可以力爭兩席。

泛民票源分散

眼見兩名建制派對手均開出強陣，白鴿黨早前亦唔怕面懵、擺明抄橋，通過改派主席鐵頭仁，夥拍資深立會議員涂謹申出戰，踢走知名度較低嘅新人尹兆堅，希望可力爭兩席之餘，再或多或少帶挈吓該黨嘅五區候選人。不過最近就有唔少街坊同佢哋講，只會喺選舉中支持鐵頭仁或阿涂，唔會投票畀該黨其他候選人，令該黨大失預算。

據白鴿仔分析，建制派選民對自己支持嘅政黨忠誠度好高，唔少都會將超級區會同地區兩票投晒畀同一個黨，相反泛民支持者對民主嘅忠誠度就高，但未必會瞓身支持同一泛民黨派。加上泛民喺多屆立會直選中都分開名單參選，佢哋嘅支持者早已習慣一家人分票，認為咁樣先至夠公平同對整體泛民最有利。因此今次白鴿黨改派鐵頭仁出選超級區會，隨時會令該黨喺五區直選輸番凸，贏一席輸五席。

為免呢個噩夢成真，白鴿黨嚟緊會加強宣傳同教育佢哋嘅支持者，希望佢哋兩票全投該黨，唔好益其他泛民，但啲選民會唔會咁聽話，真係未知之數。講到尾，當初大力支持呢個騎呢超級區會制度嘅，正正就係白鴿黨，臨時換人參選又係佢哋自己決定嘅，呢次名副其實作繭自縛，唔抵可憐！