聲名狼藉拒落台 貪曾教壞下一代

貪字得個貧，曾蔭權狂貪暴「舔」窮奢極「恥」，幾時會「貪曾」變「貧曾」呢？

快嘞，家陣全港市民要佢引咎辭職，廉政公署又準備請佢飲咖啡，只要開中任何一瓣，呢位「香港第一貪官」就會一鋪清袋，叮！

要求貪曾滾蛋，理由多到數唔晒，無能啦、無恥啦、無知啦、貪腐啦……以下呢個理由，大家又聽過未？就係……教壞香港下一代！

教育評議會踢爆，煲呔曾開口埋口話重視教育，實際係教育政績交白卷。最離譜嘅係，佢五年之內有時間周遊列國豪華外訪五十五次，但係本地教育團體要求同佢會談咩，對唔住，數埋得嗰五、六次咁大把咋！港府阿一都完全唔重視教育，叫教師點樣勸學生勤力讀書呀？無疑為下一代樹立極壞榜樣。

叮佢個鎯鎯，貪曾無能誤港眾所周知，估唔到佢遺禍嘅原來唔止一代人，仲有香港嘅下一代。教壞下一代，等如摧毀香港嘅未來，貪曾真係害人不淺o架！

其實，「痛心特首」教壞下一代，又點止影響學生嘅向學心態吖？連有冇正確人生觀都成問題呀。試諗諗，港府阿一貪婪無度貪腐成性，學生會點諗呢？梗係行差踏錯都覺得理直氣壯啦。被阿Sir教訓？一口就彈回頭：「特首都係咁啦！唔貪唔搶，第日點做高官呀？」

仲有，教師教學生，知錯能改，善莫大焉。但係你睇吓煲呔曾，貪腐醜聞長爆長有，嗰頭被人踢爆傍住富豪黐飲黐食，觸發全城怒潮，呢頭居然即刻走去南美豪歎總統套房，屢錯不改，明知故犯。連港府阿一都係無法無天嘅積犯，學校叫學生誠實認錯，搵鬼聽囉。

所以教評會係啱o架，以身作則，對貪曾直斥其非，為莘莘學子樹立楷模。教評會唔止口罵，仲有實際行動，話預計貪曾本月中會出席「特區行政長官卓越教學獎頒獎禮」，認為貪曾玷污得獎教師，所以決定避席以示抗議。

無錯嘞，貪曾庸碌無能，私德有虧，同「卓越」兩字根本大纜都扯唔埋。如果有人頒發「特區行政長官卓越貪腐獎」，搵呢位「痛心特首」去領獎就實至名歸嘞，叮！

一句講晒，聲名狼藉拒落台，貪曾教壞下一代。正如教評會同工聯會話齋，貪曾貪腐之罪嚴重，不落台唔足以平民憤。貪曾呀貪曾，咪再教壞下一代，快快自我了斷引咎辭職，當臨尾做番一件好事，為自己贖罪囉，叮！