政壇：政商定格：女拔校長行路有陣風
拔萃女書院校長劉靳麗娟係新任婦女事務委員會主席，點樣兼顧全校千幾個學生同婦委會嘅工作呢？劉太話幾忙都好，每晚都會游水keep fit，一游就二、三十個塘，喺學校更加出咗名行路極快，有學生同佢講：「Mrs Lau點解你行路有陣風嘅？」佢話巡堂唔會搭車立，行路當做運動，運動好身體好自然就精力充沛，工作都充滿活力。
既然學校支持佢做婦委會主席，佢一有機會就同學生分享做婦委會嘅工作經驗，等學生清楚佢喺出面做緊乜，並唔係幾個闊太玩玩吓。
佢七二年喺拔萃畢業，九○年由加拿大返港去拔萃教書，佢話當年首日返學就要影班相，有學生就要求佢着住校服一齊影，咁啱佢喺拔萃讀小三嘅女放學，兩母女就着校服影合照，呢張相都算經典囉！
劉太（右）二十二年前同七歲囡囡一齊着住拔萃校服影合照。（受訪者提供）