政壇：搞搞政：港島搶位阿王挖樹根

喺九月立法會選舉，工聯會屬意由新界西嘅立法會議員「阿王」王國興落港島搶位，坊間話阿王同會代表建仔出選港島嘅東區區議會主席鍾樹根票源重疊，令阿王選情變得險峻。為箍實港島東嘅支持者，工聯會尋日宣布推出第二部流動中醫服務醫療車，逢星期三服務小西灣同柴灣街坊，目的昭然若揭。

建仔嘅進出口議員「象哥」黃定光係工聯會會長林淑儀嘅老公，呢位工聯「姑爺」舊年幫手拉線，成功爭取到善長捐錢為工聯會購置首部醫療車，據講醫療車嘅反應唔錯，所以今年再添食購置第二部，拉線嘅又係佢。

好多區都有工聯會嘅工人俱樂部診療所，單靠醫療車又可以服務到幾多市民吖！不如話當佢係流動廣告牌好過。柴灣同小西灣一帶一直係樹根嘅地頭，工聯會今次殺入呢區，擺明係要同建仔爭一日之長短，即係挖「樹根」啦！不過話時話，工聯會呢部醫療車係由象哥促成嘅，唔知建仔班領導層會唔會唔開心呢？