政壇：工黨成員參選自掏腰包
各黨派正備戰立法會選舉，參選名單亦紛紛出爐，成立咗大約半年嘅工黨，呢個星期六就會開會員大會決定參選名單，雖然工黨背後有職工盟支持，但係面對對手工聯會來勢洶洶話要籌二千萬元選舉經費，工黨主席李卓人就話，佢哋籌到有工聯會一成嘅選舉經費已經好好喇！
職工盟尋日搞茶敍介紹新一屆執委同秘書處主要職員，身兼職工盟秘書長嘅阿人就希望未來三年能夠將依家十七萬幾會員數目再提升，爭取調高最低工資、設立標準工時同集體談判權等，但最重要就係籌錢改善工會財政咁話，今晚六四燭光晚會就會賣衫籌款喇。
立法會選舉在即，阿人仲話已經同有意參選嘅黨員講明，可能最後都要自己啃啲經費，自己畀啲錢去出選。