政壇：金刀梁忙公職封刀無期
行政會議成員「金刀梁」梁智鴻身兼港大校董會主席，任期今年十一月屆滿，但續任與否，佢仲未收到通知。對於係咪由恒隆地產主席陳啟宗接任校董會主席一職，金刀梁就話唔知道，只係話絕對尊重政府嘅決定。
金刀梁又話縱使退落嚟，仍會繼續佢嘅泌尿科醫生，即係話佢唔會有封刀嘅一日。金刀梁嘅太太、瑪麗醫院前放射科部門主管馮令儀，亦剛於兩個月前喺服務咗四十年嘅瑪麗醫院榮休，兩公婆將繼續參與社會公職。
佢嘅胞弟、公開大學校長梁智仁就認為年紀大唔代表能力下降，有啲大學部門係好需要有經驗嘅人才。佢話以大學校長為例，除咗學術上要有認受性，仲要有豐富嘅人生閱歷同廣闊嘅社會網絡，全部都需要時間累積與沉澱，所以擔任大學校長嘅人，年紀都有番咁上下。
梁智鴻夫婦熱衷公職，唔願退休。