政壇:阿Ron發叔睇樓市走兩極

行政會議成員掌握政府高度機密敏感資料,有乜嘢重要決策都係第一個知,所以每位行會成員嘅買賣物業走勢,都成為經濟好壞嘅重要指標。但行會內有兩位成員對後市睇法似乎好唔同。

齊齊睇淡新界前景?

由於行政會議成員所有土地買賣都要向行會申報,所以邊個入貨邊個出貨,全部一目了然。有「新界王」之稱嘅鄉議局主席發叔最近喺五月五號通知行會秘書處,話自己同老婆一齊持有一個位於元朗區嘅住宅出租物業已經賣出。我哋睇番往績,原來發叔去年十二月開始秘密散貨,由三間減持至依家一間不剩,睇嚟佢都覺得樓市已經去到頂。

除咗賣樓,發叔連地都賣埋,同樣喺五月五號向行會申報,賣出四幅位於元朗區嘅土地,另外兩幅喺屯門區嘅地亦沽出。六塊地入面,有四塊用嚟收租,有固定收入都要無啦啦賣走,點解要散貨?似乎發叔一係等錢使,一係個賣價好吸引。

有人做淡友,亦有人做好友。本身都有幾多物業嘅行會召集人阿Ron夏佳理就密密掃貨,佢一向鍾情住宅,喺香港有三個住宅單位,一個自住其他收租,仲有兩個喺英國。但最近佢殺入商廈,五月十五號向行會申報,自己喺南區掃咗兩個寫字樓單位,全部用作投資用途。特別之處係呢兩個寫字樓單位,阿Ron分別以兩間公司名義持有,似乎唔想咁高調畀人知,唔通遲啲再有其他動作?

兩人看似對樓市有唔同睇法,但睇真啲就發覺,發叔喺新界散貨,阿Ron就睇好南區商廈,兩人都咁睇淡新界前景,似印證咗啲嘢喎。究竟邊個先係樓市明燈,過幾個月就知!

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報