公帑豪遊列國 煲呔盡地一貪

曾蔭權爵士貪威識食，不務正業，論政績乏善可陳，攞着數不甘後人，可以講係歎到最後一分一秒。

煲呔曾借外訪之名豪遊列國，住得舒適，玩得招積，早就唔係乜嘢新聞，但唔講唔知，過去五年佢總共出訪五十四次，足迹幾乎遍布五大洲，平均每年十一次咁滯，唔怪得叫「離岸特首」喇。係人都知，香港嘅國防及外交由中央負責，你話佢頻頻外訪究竟為乜呢？

小數怕長計，離岸特首用公帑周遊列國，五年可賺取航空公司飛行里數獎賞超過三十四萬里，足夠換取十一張香港來回北京或東京嘅經濟客位機票，呢啲飛行里數點樣處置，特首辦始終唔肯交代。

有學者就講得啱嘞，呢的飛行里數獎賞係公眾利益一部分，市民有權知道，當局含糊其詞，拒絕交代，擺明心中有鬼喇。嗱，立法會議員謝偉俊不滿當局拒絕交代飛行里數事宜，呼籲議員支持彈劾煲呔曾，睇佢呢次仲走得去邊。

煲呔曾豪遊列國，納稅人荷包有幾傷？淨係二○一一至一二年度咋，煲呔曾同隨員嘅外訪開支係四百四十六萬元，○七年七月到今年一月，相關開支總額係一千零六十七萬元。煲呔曾任期愈接近尾聲，出埠就愈頻密，細路仔都知道係乜嘢事喇。

數字冇花冇假，唔呃得人。當局仲死撐話，特首及司局長外訪要經政策委員會核准，以確保行程可以向外界展示香港優勢同拓展商機喎。叮，簡直係此地無銀三百両，市民信至奇！

有心推銷香港拓展商機，一上台就應該做嘢，有乜理由臨執包袱至周圍去？你估佢係旅遊大使吖？仲要有咁遠去咁遠，有咁貴住咁貴，扮總統住套房，每晚盛惠五萬四千蚊，擺到明搵納稅人着數啫！

上樑不正下樑歪，煲呔曾假公濟私，手下有樣學樣，官員愈無能，遊埠就愈頻密。環境局局長邱騰華任內外訪六十次，財經事務及庫務局局長陳家強外訪四十三次，連屢爆醜聞嘅食衞局局長周一嶽都唔輸蝕，外訪超過四十次，問你服未！

唉，庸官個個無心施政，做嘢避得就避，遊埠就多多益善。公僕先天下之樂而樂，唔怪得做主人嘅市民冇啖好食，香港七國咁亂喇，叮！