政壇：政商定格：曹森捐舊衫撐低碳生活

電能實業雖然喺香港係做港燈業務為主，但就成日叫香港市民減低碳排放，仲「身體力行」搞咗好多環保活動，連集團員工一向馬首是瞻嘅董事總經理曹棨森，都話要參加舊衫回收計劃，又專登搵太太幫忙執番啲衫，多年嘅戰衣西裝等舊衫都被曹棨森親手放入回收箱，話希望捐出去畀啲有需要嘅人。

下周二係世界環境日邁入四十周年，電能實業又點會唔落力響應，集團已有逾一千名員工報名參與為期一個月嘅「衣食住行」低碳生活，其中有十項「自選低碳行動清單」有近七成員工力撐，估計最少可減少25公噸二氧化碳排放，差唔多等如種植一千棵樹。

原來日常生活嘅低碳行動唔係好難，好似買少件衫、睇少個鐘電視、坐公共交通工具等。連電能實業特備低碳午餐「田園沙律配雞粒泡飯，另送時令鮮果杯」都開胃過人，唔怪得集團上下都咁齊心啦！