政壇：搞搞政：鄧家彪郭偉強殺入立會
喺立會勞工界功能組別中，工聯會佔咗兩席，嚟緊嘅九月立法會換屆選舉，亦已敲定由離島區議員鄧家彪同東區區議員郭偉強接棒，佢哋都係四十歲未到嘅專業社工，啱晒工聯會嘅年輕化路線。
工聯會內部規定勞工界議席只可做一屆，如果想繼續做立會議員，就要憑實力轉戰直選。就因為咁，工聯會每屆至少培養到兩個年輕新面孔，今次呢兩位新星賣點除年輕同專業外，更分別參加過兩屆區議會選舉，相信將來轉戰直選都冇難度。
先講鄧家彪，曾經幫過工聯會榮譽會長、「票后」陳婉嫻搞選舉，○七年被安排去東涌做開荒牛，順利當選，舊年仲順利連任。至於郭偉強情況差唔多，以往做過工聯會立法會議員王國興嘅助理，同樣○七年首度參加區議會選舉勝出，舊年連任。兩個都係紅褲子出身，如果未來四年做得好好睇睇，肯定係工聯會嘅明日之星。
設計圖片及對白