政壇：青聯超筍工月薪五萬
配合香港青年聯會成立二十周年，佢哋喺下月九日搞嘅第四屆招「工」日較往年更盛大，逾二百五十間企業公司，提供逾三千個職位畀大學同大專生即場面試。據聞今屆最「筍」工作係財務分析員，月薪達五萬元。
青聯主席葉振都同活動籌委會副主席楊鼎立、郭永亮、鄭詩韻等核心成員瞓身宣傳活動。講起搵工辛酸史，鄭詩韻話九七年畢業返港，不幸遇上金融海嘯，最終任職月薪一萬元嘅分析員，每周工作一百小時，做到冇晒人生樂趣，後來自行成立公關公司先搵番自我。
講到見工秘笈，佢哋異口同聲話，見工時千祈唔好「印印腳」或冇腰骨，切記要同僱主保持眼神交流，表現出對工作嘅「一團火」。