政壇：回憶冧樓林鄭淚灑電台
發展局局長林鄭月娥尋日上電台節目回顧任內工作，仍然唔評論係咪會出任下屆政務司司長。外號「好打得」嘅林鄭提及傷心事，都忍唔住當場感觸落淚。
前年一月底馬頭圍道塌樓慘劇係佢任內最觸動嘅事，佢話當日視察現場好傷感，因為死傷者都住喺劏房，正係社會上最需要幫助嘅人，因而令佢下定決心解決樓宇安全問題。佢仲透露，當日喺立法會辯論時一度感觸，有傳媒形容佢「淚盈於睫」，原來當時佢尊敬嘅媽媽處於彌留狀態，喺幾個星期後離世，佢一路講一路聲沙沙，雖然抬頭強忍，最終眼淚奪眶而出。
即將任滿，佢實牙實齒話會搞掂被形容為「燙手山芋」嘅河東花園同舊政府總部西翼保育工作，話唔想留番啲手尾畀下屆局長喎！
林鄭月娥