政壇：陳振聰聞龔母爭產愕然

捲入已故華懋集團主席龔如心爭產官司嘅商人陳振聰，雖然喺官司中節節敗退，仲要變賣資產應付巨額訟訴費，但無損佢嘅心情。尋日下午約三點鐘，陳振聰同太太譚妙清、私生女Polly倫培珍、細佬陳振國同一男友人，齊齊現身中環置地廣場四樓嘅星級法國餐廳。

期間三個大男人有講有笑，Polly亦不時加入話題，氣氛輕鬆。但陳太就經常玩手機，冇乜兩句。佢哋坐喺人來人往嘅路邊位，並冇刻意避開人群。佢哋歎茶歎到大約六點十五分埋單。

記者上前打招呼，陳振聰笑笑口話今次冇乜特別嘢傾，一般飲茶啫！問佢律政司代表律師提出龔如心嘅高齡母親可能係遺產受益人之一，佢聽完有少少愕然，話冇睇到。至於外間盛傳佢變賣資產套現應付官司，佢只係不停講「多謝關心」，然後同妻女一齊登上座駕離去。

不過，記者發現接載佢哋嘅座駕係登記喺某間車行名下嘅日產LEAF電動車，早前都仲見佢坐開一架掛有中港牌嘅豪華七人車，唔知去咗邊呢？唔通變賣咗？