政壇：夕陽政助唔認被叮

煲呔曾喺○八年僭建問責制請返嚟嗰班副局長同政治助理向來被批評無表現，政府日前宣布下屆政助將會大幅減薪外，盛傳有幾位政助亦冇得留任下屆政府。唔知係咪咁，政制及內地事務局就特意安排幾位政助到立法會同記者講感受。唔通係幫佢哋鋪砌離任下台階？當然佢哋唔會話自己保唔住飯碗冇得撈啦，只係暗示自己唔想撈啫！睇嚟係想跌落地執番拃沙。

食物及衞生局政助Paul陳智遠、民政事務局政助Caspar徐英偉同教育局政助Jeremy楊哲安尋日落立法會做「狗仔隊」。阿Paul同Caspar都話未諗過去留問題，而阿Paul就話好難評價自己呢幾年嘅工作表現，又略為感嘆話政助多數從事幕後工作，公眾未必會睇到佢哋嘅一舉一動喎！

楊哲安呻無得發揮

相比之下，Jeremy就老實得多，佢話留低嘅機會唔大，又話做咗教育局差唔多四年，期間冇政策由佢專門負責，搞到佢覺得發揮空間唔大。佢又話唔排除會重返富貴黨做幕後軍師，但卸任後要同太太張燊悅及兩個囡囡去旅行叉電喎！

另外，根據政府向立法會提交嘅資料，多名政助喺立法會同區議會嘅出席率奇低，財經事務及庫務局伍潔鏇喺過去四年只出席咗十四次，而財政司司長政助葉根銓同勞工及福利局政助莫宜端都只係出席咗十五至十八次會議。出席公開活動次數咁少，又好難話畀人聽佢哋係有做嘢嘅。