檢測食物求其 官僚把關兒戲

香港自詡美食天堂，究竟食嘢安唔安全呢？呢個問題就睇你點睇嘞。

從港府嘅角度睇，但凡入得香港嘅食物都入得口，所有經過食物安全中心檢測嘅食品都係安全嘅，如果唔係，以前爆出蘇丹紅禽蛋、孔雀石綠魚、三聚氰胺奶、哮喘豬等等，當局就唔會次次都拍晒心口話冇事啦。係，喺爆大鑊之前的確係冇事嘅。

所以咯喎，從市民嘅角度，食物安全就好似一個計時炸彈，隨時話爆就爆，問題係豬肉有事定係牛肉出事，係毒魚為患定係毒菜氾濫o架咋！

嗱，話口未完，又有食物測試結果出爐，睇吓今次又點講先。食安中心話喎，喺市面抽取二百個刺身同壽司樣本化驗，結果百分之一百通過測試！

百分之一百通過測試，聽落就幾好聽嘞，但究竟係咪百分之一百安全先？你知啦，當局檢測食物兒戲到極，成日都話無問題，結果咪一次又一次出事！

遠嘅唔講吖，本報日前獨家化驗港深兩地食肆出售嘅燒蠔，揭發有三個購自本港嘅燒蠔樣本含有致癌重金屬「鎘」，其中一個仲超標二點二倍添！食環署事後補鑊，指三間涉事店舖均為持牌食肆，承諾會派員到涉事店舖巡查，抽取樣本化驗同採取跟進行動咁話。

毒蠔周街賣，唔通當局從未進行檢測？梗係唔係啦，食安中心自爆去年一月至今年三月，共取得超過八百個蠔樣本作化學及微生物測試，結果又係全部滿意。你話喇，當局嘅所謂檢測係咪形同虛設吖，叮！

講起檢測兒戲，呢類例子隨手都搵到一打。好似食安中心去年抽驗咗二萬一千幾個蔬菜樣本，話合格率達九成九；點知環保組織化驗多間大型超市嘅十二個蔬菜樣本，驗出全部有嚴重「濫藥」問題，其中一個樣本甚至含有十二種殘餘農藥，問你服未！

叮你個鎯鎯，食安中心究竟點樣做食物檢測o架？港府又點樣為市民把關o架？餐餐都話無事，唔係百分之一百通過測試，就係九成九合格，但係傳媒一驗就驗出毒蠔，環保組織一驗就驗出毒菜。唔使問阿貴，當局所謂嘅檢測，就算唔係百分之一百敷衍塞責，都係九成九漏洞百出！

禍從口出，病從口入，咪話太一叮唔提醒港府，食物安全攸關市民健康，如果又爆大鑊，市民百分之一百唔會放過你哋，叮！