SUN微博：打橫嚟講：還我投票權

上星期，在此寫了篇《是誰搬走了我的投票權》（5月22日），申訴香港立法會功能組別選舉制度之虛假廢到嘔，無理褫奪咗我嘅投票資格，點知，仲有更荒謬的事在後頭，就係一生貢獻咗畀演藝界嘅粵劇泰斗阮兆輝大師，雖然佢曾獲「香港藝術家年獎」及「藝術成就獎」，甚至係藝術發展局嘅現任執委，佢都不能代表「文化界」做選民，真何其荒謬！

選舉事務處訂立萬九項規條，目的好應係審核選民資格，身份是否符合該投票界別，而非依家暴露人前的「假民主」手段，以反智的制度為藉口，抹殺業內有貢獻、有地位合資格人士的投票權。

功能組別，擺明係政治贓物，為政府保駕護航的舉手機器，無靈魂的扯線傀儡、分組點票的攔路狗，更是民主選舉中的大毒瘤。可惜有好多卑賤的粉腸愛「自動當選」，爭住上。

我與阮兆輝大師因沒有申請政府資助，就不是選民喎！好比不拿綜援便不是香港人般荒謬；更荒謬的是，有傳媒找選舉事務處回應，他們竟表示「不評論個別事件」喎！吓！選舉權係市民應有的基本權利，係關乎香港選舉法律的問題，你哋有無違反選舉條例呢？請問！啱唔啱都應給一個答覆o架！怎可一句官腔便算！

我會保留向老廉、平機會、申訴專員公署同候任特首辦投訴及司法覆核的權利，除非你哋還我投票權啦！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊鬧爆夕陽政府