政壇：CY愛將轉戰政治公關
候任特首CY梁振英當選後，只係搵咗三個「近身」入候任辦公室，反而多年來幫佢應付傳媒嘅私人助理Scott鄭希暄就疑似銷聲匿迹，有人即時懷疑CY對Scott係咪「用完即棄」，但其實只係美麗嘅誤會。
查實Scott收埋自己係另有大計。據聞佢最近開咗間公關公司主力做策略公關，無論政治同企業公關項目都無任歡迎，之後又會喺報紙寫吓文章月旦時事，最近仲有人見佢以時事評論員嘅身份上咗路訊通嘅節目，幫CY手推銷新政府架構添。
佢接受我哋查詢時小心翼翼，多番強調佢嘅言論並唔代表CY立場，有人睇過有關節目後講笑話，佢認識新架構概念嘅程度，拍得住候任辦主管羅范椒芬，難怪可以跟咗CY咁多年喎！