政壇：CY唔飲酒照請議員品紅
候任特首CY梁振英喺上月訪京後，隨即出席建制派喺中總舉行嘅「大和解」飯局，但多名支持唐唐嘅議員缺席，惹來「深唐」中人堅拒「大和解」嘅揣測，事隔一個多月後，CY喺候任辦主管羅范椒芬陪同下回請建制派，合共有二十七名議員出席，包括上次冇現身嘅唐唐「家臣」林大輝同富貴黨主席劉健儀，中總代表黃宜弘專程帶埋茅台赴會，點知慘食檸檬，皆因CY唔飲酒。
雖然CY唔飲酒，但就帶咗紅酒請議員飲，當見到劉健儀杯中冇酒，仲主動斟酒。CY又親切稱呼身邊嘅民建聯主席譚耀宗為「耀宗」。「耀宗」則喺席上疑似意有所指，寄語CY要廉潔奉公，未知係咪有意寸爆「貪曾」曾蔭權？
ＣＹ回請建制派，個別「深唐」中人亦有出席。