政壇：吳克儉硬銷港式教育

呢排盛傳考評局主席吳克儉將會做下屆教育局局長，但直至尋日佢接受傳媒訪問時都仲未肯承認，但喺言談間，佢就大講自己從畢業後已經從事教育工作，絕對唔係外行人，仲形容自己係「教育邊緣人」添！

香港班高官出晒名崇洋，口頭話支持香港，但暗啞底就好驚香港教育制度，事關香港嘅教育制度向被謔稱為填鴨式教育，啲小朋友發揮空間好細兼且壓力大，所以由細開始已經送晒啲仔女去外國讀書，當中包括保安局前局長、現任立法會議員嘅葉劉淑儀，當年一早就送個女去美國讀書，早前仲去美國出席囡囡嘅大學畢業禮。

不過，吳克儉尋日就話自己對本土教育充滿信心，所以咁多年嚟從冇逼兩個仔去外國讀書，佢哋都係喺香港讀中學，一個更留番喺香港讀大學，另一個就讀完書話想去外國見吓世面，先至出外留學。

撐國民教育利搵工

吳克儉竟然擺兩個仔出嚟撐本地教育嚟做賣點，唔係為做教育局局長鋪路，咁係乜嘢呢？之不過，香港有好多家庭都好似佢咁，仔女都係喺香港讀書，咁咪好多人都可能適合做教育局局長呢？

講到教育局未來要處理唔少爭議議題，包括國民教育。吳克儉就話要視乎當局點推銷，如果話好多大企業花好多錢畀員工上國情班，但現時學生求學時期就可以了解國情，對未來搵工有一定幫助，相信唔會有太多人反對。

人力資源出身嘅吳克儉仲澄清，人力資源同教育係息息相關，所以自己都算有多年豐富教育工作經驗喎！