追究曾商勾結 還我官場廉潔

一年容易又「七一」，今年最唔同嘅係，夕陽政府壽終正寢，市民無得再嗌「曾蔭權下台」，肯定會若有所失。你知啦，煲呔曾管治無能禍港殃民，貪腐成性醜聞不絕，踢走貪曾已經成為全港市民嘅共同願望，目標一旦消失，今年七一遊行隨時會失去焦點o架！

嗱，可能主辦單位都諗到呢點，所以咯喎，今年嘅主題定為：「踢走黨官商勾結，捍衞自由爭民主」。黨官商勾結嘅「官」講緊邊個呀？答案呼之欲出，咪就係香港和珅貪曾囉！

「香港第一貪官」落台之後，一樣難逃遊行炮火，原因好簡單。一則，貪曾已經變成市民頭號公敵，遊行無咗佢，點夠號召力！二則咯喎，佢一手一腳發揚光大嘅官場貪腐歪風愈吹愈烈，市民唔趁七一上街反貪，仲等幾時？

主辦單位係咁講嘅，香港回歸十五年，經濟同民生發展走向死胡同，大財團推高地價、樓價同租金，市民未能有一個安樂窩。嗱嗱嗱，樓價與租金齊飛，經濟共民生齊死，搞成咁嘅局面，煲呔曾就係罪魁禍首。

叮佢個鎯鎯！煲呔曾庸碌無能都算嘞，仲要貪腐無恥，唔係傍住富豪黐飲黐食，就係周遊列國歎世界，高官一個二個有樣學樣，經濟同民生唔死晒火至奇。仲有呀，如果唔係貪曾擇惡固執，上場之後土地政策全面向財團傾斜，樓價租金又點會飆升到今日高與天齊。話無「曾商勾結」，無枱底交易，無利益輸送，講都無人信啦！

市民眼睛係雪亮嘅，貪曾係咪無能、係咪貪腐，民調結果反映得一清二楚。中大最新民調顯示，貪曾嘅民望又創新低，跌至四十三點一分。呢鋪真係應咗貪曾自己嘅金句：民望跌到最後一分一秒。

一個民望跌到一仆一碌、年年七一被人嗌落台嘅貪官，的確係人人踢之而後快。今年七一遊行雖然無得再嗌「曾蔭權下台」，但可以改成「追究曾商勾結」、「制裁貪曾集團」，咁就更加啱波路！

係人都知，七一港府換屆，貪曾滾蛋將成事實，唔踢佢都要走，家陣最緊要係追究貪曾嘅貪腐罪行，將貪曾集團連根拔起，咁至係剷除黨官商勾結嘅治本之法。廉政公署一定要打大老虎，千祈咪畀貪曾輕易過骨呀！

今年七一，大家一齊高呼：追究貪曾勾結，還我官場廉潔，叮！