SUN熱辣：收費¥200一日搞掂

港人於內地遺失或被偷回鄉卡，現時根據內地出入境規定的指引，可在內地直接辦理遺失手續，補辦出入境記錄，而一般可透過兩種途徑補辦,一是到深圳香港中旅社，二是到公安局。前者的申請時間較快，但收費較高，並只限廣東省範圍；至於公安局則全國通行，收費較平，不過需時較耐，至少需要一個星期處理補辦手續。

公安局辦理要等一周

深圳工聯諮詢服務中心助理主任潘志輝表示，補辦手續有兩種，申請人可獲臨時出境證。「中旅社每次手續費大約人民幣二百元，最遲一日搞掂，公安局就每次五、六十蚊，但要等成個星期先有得拎。不過，中旅社只限於廣東省範圍，如果喺北京、上海唔見，就一定要去公安局補辦。」

潘志輝又提醒市民，若想盡快補辦證件，可做一些事前工夫，「上內地前，最好影印定啲證件，留個副本，方便核對身份。另外，每日下晝三點前去中旅社辦手續，可以即日拎到臨時出境證。」