政壇：搞搞政：勞永樂吳文遠 港島爭執死雞

喺○八年立法會港島區直選中，公文袋以八萬幾票攞到兩席，而經過港珠澳大橋同外傭官司事件後，睇怕嚟緊九月選舉跌票在所難免，加上該黨司馬文未知能否趕得切入籍，所以隨時得番陳淑莊孤軍作戰，估計最多只能攞到四萬幾票，而剩餘嗰四萬票可能變成激進派嘅囊中物，兼且已有人爭住執死雞添！

其中一個打算落港島區插旗嘅激進派係社民連吳文遠，雖然佢屬於空降，冇乜選舉經驗，但如果能繼承黨友「阿牛」曾健成○八年攞到嗰一萬票，再加上搶到公文袋一萬幾千票，入立法會都唔係冇機會。

但要數最有機會食胡嘅，好可能係勞永樂。勞永樂○八年選舉已經退出社民連，但當時都有兩萬幾票，如果佢再次參選，只要喺泛民身上吸幾千票就可當選。勞醫生話如果參選，一定會打正獨立旗幟，強調話呢種真正嘅獨立人士，喺港島有一定市場喎。佢又話其知名度唔會比○八年低，仲話咁講係有實質客觀數字支持喎！唔通勞永樂靜雞雞做民調？