政壇：全民在野黨追打貪曾
近日有個叫「全民在野黨」嘅新政黨成立，而且更係打正旗號要反貪、反腐敗、反無能，矛頭直指貪盡海陸空嘅煲呔曾。創黨主席係曾出資買英國航空母艦嘅李慨俠，而執行主席就係泰拳專家、廉政公署前副處長徐家傑，黨員仲有著名詠春師傅梁挺，成隊都係打得之人。
點解幾位要組黨？徐家傑就咬牙切齒咁話，見到貪曾執政多年都係毫無建樹，反而搞到貪污事件叢生，但立法會又做唔到嘢，擔心惡化落去港人會死路一條，所以同幾位志同道合人士挺身而出；李慨俠仲特登起咗個外號叫「滅民敵」，食正呢期興英雄漫畫熱潮，認真有噱頭。
呢個黨其中一大綱領係要五年內，令最窮家庭都有十萬元定期存款，但就唔肯講用乜嘢方法做到。雖然該黨依家只得十個黨員，但原來入黨一啲都唔難，只要唔反對黨理念、有永久居港權就已經自動入咗黨，完全冇手續。
全民在野黨幾名主要黨員講解黨嘅未來大計。