政壇：煲呔曾最後午餐拍烏蠅

「人走茶涼」係政界常見現象，但好似煲呔曾咁人未走茶已涼就幾罕見下，一定係以前做落唔少衰嘢，至淪落到咁嘅地步。講緊嘅係煲呔曾下個月同立法會議員嘅「最後午餐」，六十個議員得三十一個人報名出席，竟然有近半數議員唔去呢個畀面派對，相信連煲呔曾都估唔到臨走都要被人離棄。

秘書長驚失禮急吹雞

立法會議員每年有兩次機會，同特首、行會成員及高級官員喺立法會午宴，而下個月嗰次，就係煲呔曾最後一次出席，所以話係「最後午餐」的確無錯。由於煲呔曾就嚟走，冇人需要畀面佢，所以呢啲場合，某個程度上都係煲呔曾親和力嘅成績表。

但呢個成績表肯定唔合格，二十三名泛民得六個去，分別係白鴿黨李華明、涂謹申、劉慧卿同李永達，另外兩人就係公文袋梁家傑同工黨張國柱。

最慘嘅係建制派亦唔齊腳，建仔算係最畀面，叫咗八個黨員去，其他黨都係派代表算數，好似專業會議嘅石禮謙、身兼鄉議局主席同行政會議成員嘅劉皇發、平時忙到連會都好少開嘅霍震霆等亦未見有報名喎！最好笑係連曾經被指同煲呔曾把臂同遊嘅「曾朋友」、金融界議員李國寶都唔喺名單入面，唔知係咁啱唔得閒吖，定係忽然學精覺得要避嫌呢﹖

最衰立法會宴會廳唔使點法定人數，如果唔係得三十一人出席，分分鐘搞到流會都似。唔知係咪立法會秘書長驚煲呔曾失禮，所以尋晚再call多啲議員去，最後終於再有建仔李慧琼同勞聯李鳳英出席，佢哋都算係抵得諗喇！