門常開甩頭甩髻 跛腳鴨無心無肺

物似主人形，港府施政亂象叢生，撞板多過食飯，添馬艦新政府總部亦甩甩漏漏，多災多難，真係邪到你唔信，叮！

新政府總部甩漏頻生，醜聞不斷。牆身滲水、盜賊光顧、退伍軍人症惡菌肆虐，仲有電死技工跌傷警員曬暈保安員……如果逐樣叮一次，睇怕叮都叮到手仔軟。一句講晒，回顧呢幢新政府總部嘅歷程，就好似睇緊一部波瀾壯闊災難史。

點波瀾壯闊法？睇下嗰條樓梯「瀑布」咪知囉。由於水渠損壞，兼撞正黃雨，結果大量雨水沿大樓東翼後樓梯奔流而下，政府總部頓變汪洋澤國，令人嘆為觀止。

跟住喎，新總部又被揭發用料出錯，大樓外嘅行人通道地磚凹凸不平，製造途人失足陷阱，結果政府要補鑊重鋪地磚。好嘞，水管壞完，地磚爛完，仲有乜衰嘢呢？勁咯，新政府總部被踢爆，電費每月三百四十萬元，比舊總部高出近四倍，浪費電力有損環保，簡直係地球災難！

夕陽政府收工在即，呢座耗資五十億元興建嘅龐然大物不停丟架，連爆醜聞。「門常開」變水常流、電常嘥、路常爛，真係講都冇人信。「東方報業民意調查」顯示，三成二受訪者直指呢個地標建築淪為國際笑話；兩成三斥港府羞家，令香港丟臉；兩成二稱令人對香港無信心。

叮佢個鎯鎯！政府總部就係管治嘅象徵，家陣甩頭甩髻、醜聞不絕，夕陽政府仲有幾多管治威信，不言而喻啦。嗱，水常流暗示曾蔭權外訪遊埠歎世界，公帑好似倒水咁倒。路常爛代表跛腳鴨政府施政崎嶇滿途，寸步難行。至於電常嘥咯喎，夕陽政府翹埋雙手等收工，叫佢哋撥亂反正，等於嘥gas啦。

調查又發現，兩成七受訪者質疑港府連自己總部都管唔好，點樣管好香港；兩成四稱港府威信已經受損；兩成三指事件凸顯港府無能嘅真面目。

講開又講，「門常開」嘅怪雞外形本身已經極具象徵意義，中間開大窿，即係政府總部係空心老倌。夕陽政府無心無肺無靈魂，新總部甩漏頻生，跛腳鴨奄奄一息，何足為奇吖？

對於煲呔曾好大喜功，強行要新總部趕工入伙，調查顯示，三成受訪者直指佢係罪魁禍首。冇錯嘞，有咁嘅特首，就有咁嘅政府、咁嘅政府總部，家陣惟有希望候任特首梁振英撥亂反正，拆除豆腐渣管治，叮！