政壇：搞搞政：陳新滋快刀「殺菌」
浸會大學民調風波已告一段落，雖然浸大傳理學院前院長趙心樹已辭去院長一職，但浸大超速完成嘅調查報告疑點重重，一直存有非議。
校長陳新滋尋日喺大氣電波話咁快完成調查，係唔想好似傳染病咁愈傳愈遠，認為趙心樹辭去院長已經算係為事件負責，嚟緊佢會主力喺舊年成立嘅「卡特中心」幫手，專責聯絡美國方面。呵！原來快刀斬亂麻，就係為咗殺菌。
陳校長又話，新院長唔單止要學術好，仲要人品好，第時做唔做民調都交由佢話事，而首批有超過十人申請，會搵五個面試，希望一兩個月內有聲氣。佢仲話熟悉本地傳媒嘅人選會有優勢。可能前車可鑑啩！
此外，浸大一路想成立嘅中醫院有新進展，陳校長話已物色咗塊「靚地」，嚟緊會同非牟利機構合作，一批地就會籌錢，希望過兩三年可以落成。
設計圖片