政壇：房委會標誌「畀金錢蒙蔽」
房屋委員會決定加租後，又整色整水話免租一個月，但係人都知租金呢啲嘢加咗就冇回頭，所以唔少團體近日都紛紛走去房委會示威請願表達不滿。好似街工尋日就拉隊六十人去房委會總部示威，一班示威者仲上演街頭劇，揶揄建制派立法會議員當年支持通過公屋租金「可加可減」機制。
不過，整個活動最爆嘅並唔係呢啲基本嘢，而係街工成員將房委會個標誌改為代表錢嘅符號，仲將呢啲改圖貼晒喺房委會總部門外，將房委會個名完全遮住晒。據稱咁係代表房委會見錢開眼，亦有房委會已經畀金錢蒙蔽嘅意味喎，唔知大家睇完感唔感受到呢？
房委會標誌畀人改圖之餘，搞到連個名稱都不見天日，統統畀「錢」遮住晒。（受訪者提供）