政壇：乖女畢業禮葉劉變喊包
早前泛民喺出缺機制草案「拉布」，新民黨主席葉劉淑儀去咗美國出席愛女Cynthia葉榮欣嘅大學畢業禮，被議員轟係「逃兵」。葉劉激動反駁，更喺社交網站facebook上載美國之行相片，力證自己冇借囡囡過橋。佢又改口話唔會去平機會投訴遭「家庭崗位」歧視，無謂小事化大喎！
美國之行共八日，葉劉抵埗後，Cynthia開心到飛起，不停介紹同學畀媽咪識，葉劉一口氣出席兩場畢業禮，親自舉機為囡囡拍照，當目睹女兒與同學進場一刻，平日硬朗嘅佢都忍唔住流眼淚。佢慨嘆近年忙於立法會工作，囡囡留學四年間，只係探過佢一次，難得女兒好生性。