政壇：一鑊留低個個唔Like

下屆嘅食物及衞生局局長已有人選浮面，但人稱「每周一鑊」嘅現任局長周一嶽又未有言退等攝位，依家仲盛傳佢會接替張建宗做勞工及福利局局長，皆因有傳聞話張建宗升呢做政務司副司長嘛。不過，社福同勞工界人人都耍手擰頭，好似當一鑊係過街老鼠咁款。

眼見呢一鑊上屆政府舊瘀血有機留喺新政府，香港社區組織協會主任何喜華斬釘截鐵咁話：「唔覺得佢係一個合適嘅人選！」佢話見到周一鑊搞到公營醫院一團糟就知佢能力有限，不如快快退落嚟啦！

落區隨時被圍堵

食衞局前身係食物、福利及衞生局，理論上周一鑊對福利政策都有一定認識。但當時做立法會社福界議員嘅張超雄踢爆，話佢當年連見吓殘障人士家長咁簡單嘅要求都唔肯，仲要白紙黑字咁回覆，話「冇需要見」啲家長。周一鑊做官前曾活躍復康界，一上任就唔識人，張超雄依家都只能輕嘆一句「可能佢親疏有別啦！」佢仲話如果周一鑊第日要符合梁振英要求落區，隨時會畀人圍堵，因為佢實在做錯太多嘢喇。

勞工界亦唔睇好呢個毫無勞工政策經驗嘅周一鑊。工黨主席李卓人話，佢喺任內毫無建樹之餘，仲搞到醫療政策傾斜於私家醫院，梁振英都唔知係咪揀無可揀，所以亂點鴛鴦。

工聯會王國興質疑周一鑊唔清楚勞工界議題，更遑論對千絲萬縷嘅勞資關係；佢黨友KK黃國健對現任勞工處處長卓永興好有意見，仲感嘆勞工處有個咁嘅大佬，都好難有乜作為。

無獨有偶，卓永興曾任食環署署長，係周一鑊手下，對於勞福局接連「接收」食衞局棄將，KK都話唔知係咪無地方安置嘅人就會調去勞福局。