政壇：政商定格：四叔助千校長海外進修
「四叔」李兆基係創辦人兼擔任信託理事會主席嘅培華基金，今年三十周年，特登喺北京人民大會堂大搞慶祝典禮。咁多年嚟，培華已幫內地培訓人才一萬八千人次！四叔仲話只要幫到國家，會繼續出錢出力。
仲記得早年培華上京搞活動同頒獎，分別嚟自四大家族嘅主要捐款人四叔、霍英東、「彤叔」鄭裕彤同郭炳湘都會出席。今次三十周年，訪京團四、五十人同樣浩浩蕩蕩，由四叔帶住兩位公子家傑、家誠，彤叔就單拖赴宴，郭炳湘可能忙於私人嘢而冇出席。
今年培華就主力資助千名中西部大學校長海外研修，培華基金同四叔各捐四千萬人民幣，五年內資助中西部大學書記校長等，到歐美頂級大學考察交流，而香港嘅幾間大學都會參與，所以多位校長教授都有隨行。
四叔（中）捐出四千萬人民幣，資助中西部大學書記校長等到歐美進修。