政壇：搞搞政：張炳唔撈教院新工賣關子

盛傳出任下屆政府房屋及規劃地政局局長嘅張炳良（張炳），尋日宣布會喺六月底辭任教院校長，準備迎接新崗位。雖然對新崗位隻字不提，但咁啱係政府換屆前離任，佢又突然提早半年解約，相信大家都估到啲喇！

丟低正名大學心願

喺○七年教院發生干預學術自由風波後，張炳獲薦做校長，主力爭取教院正名為大學，而佢一句「指日可待」確實為教院師生帶來希望，但依家突然宣布中途棄車，丟低教院正名心願，相信會惹來師生議論紛紛。不過，佢話院校政策亦唔係校長一人決定，離任唔會影響教院正名，估計教院正名仲需要兩年時間喎！

問到「新崗位」係乜？張炳重申未係時候講住，但就話新工充滿挑戰。再問佢係咪會離開教育界，佢不置可否，只強調「一日係教授，一世都係教授」喎，仲話好唔捨得教院，將來即使做乜嘢都會心繫教院，繼續關注教院正名。如果張炳日後成為新政府內閣，唔知協助教院正名會唔會更加好辦事呢？