政壇：疑似環境局長現身立會
立法會議員劉秀成尋日宴請環保建築專業議會成員，去立會新宴會廳午膳，盛傳擔任下屆政府環境局局長嘅綠色建築議會副主席KS黃錦星亦係座上客。
劉秀成帶咗KS等人去參觀新大樓嘅綠化屋頂同其他環保設施。身為建築師嘅KS話，今次係首次參觀立法會，大讚大樓嘅綠化工作做得唔錯，好似大樓自然採光嘅設計，令太陽光可以透過玻璃照入室內，相信應該會慳番唔少電。
被追問七一後係咪會多啲喺立法會出現時，一直健談嘅佢突然成塊面紅晒，仲捉住記者隻手握完又握，好明顯係怕醜唔想答喇！不過，如果KS真係做咗局長，將要面對更多嘅尖銳問題，咁怕醜點得呢？
被問到做局長問題時，黃錦星面都紅晒，猛同記者握手。