政壇：立會投票機「肌肉勞損」
出缺草案嘅拉布戰踏入第十一日，三十幾位建制派議員將舉手同撳鐘投票呢兩個動作重複咗幾百次，有人講笑話，可能好快會因為肌肉勞損而投降。不過，尋日首先投降嘅反而係立法會嘅投票系統。話說大約早上十點半鐘，一眾議員喺響鐘後發現投唔到票，搞到主席要宣布休會，秘書處檢查後發現投票系統出現故障，好彩淨係用咗五分鐘就搶修成功。
有議員話機器故障係人之常情：「莫講話機器壞，連續坐咁耐人都壞啦！」到目前為止，仲有四百六十二項修訂要留待下周三繼續表決，秘書長吳文華話有信心下星期五早上可以完成三讀。
