政壇：高官拉布限七分鐘

下屆立法會增加十個議席，班吹水唔抹嘴嘅議員就擔心人數多咗，每個會期每人可以提出質詢嘅數目會減少，令佢哋少咗機會表演吹水，於是就話要修例增加每次開會可以提出質詢嘅數目，仲話要限制啲官員發言時間咁話。唔通班議員經過今次議席出缺安排嘅「拉布」後已經怕怕，所以要禁止啲局長「拉布」﹖

因應下屆議員人數增加，立法會議事規則委員會建議每次大會嘅議員口頭質詢由依家嘅六條加至七條，書面質詢就由十四條增加到十六條。每項口頭質詢嘅時間就加多兩分鐘至二十二分鐘，但就會限制官員主體答覆唔可以超過七分鐘。咁樣每項質詢就可以畀到至少四個議員發言。秘書處喺今年二月就建議諮詢咗班議員，結果有八成半議員都贊成。

其實依家每次開會每項口頭質詢一般要二十幾分鐘先完，好多時都係因為啲局長回覆質詢時發言時間過長，口水多過茶。好似「每周一鑊」嘅食物及衞生局局長周一嶽，同埋勞工及福利局局長張建宗都係「長氣袋」，首輪回覆都已經講成十幾分鐘。但係時間長唔代表言之有物，反而好似想拖延時間，等啲議員冇時間再追問咁。

政府對建議有保留

可能因為新建議令官員冇得再玩「拉布」，政府對於委員會嘅建議就有保留，話官員可唔可以喺七分鐘完成到主體答覆嘅發言，係取決於質詢本身嘅內容同篇幅。仲話如果議員質詢嘅篇幅好長或涉及範圍廣泛嘅事宜， 要有關官員喺七分鐘內作詳細回覆可能會有實際困難咁話。

建制派成日批評搞「拉布」嘅議員係浪費公帑，如果佢哋畀官員「拉布」，咪即係包庇政府嘥納稅人錢。唔知係咪咁，委員會主席譚耀宗就話因為個建議大部分議員都有共識，所以唔再改動。即係趕絕官員拉布喇！