執法不力打茅波 淫審諮詢枉做騷

假的真不了，港府就檢討淫審制度進行嘅所謂公眾諮詢，做戲咁做，一睇就知係假諮詢，真護淫。呢，商務及經濟發展局早前推出第二輪公眾諮詢以來，由於虛情假意，一直備受抨擊，日前舉行首場公眾論壇，現場更加係炮聲隆隆。唔少出席市民直斥條例過時，根本冇阻嚇作用，更批評當局執法不力，官員「又懶又蠢」，「唔知做過乜」，變相縱容淫賤傳媒宣淫販賤。

市民咁勞氣，唔係冇道理o架，當局長期包庇淫媒，做法實在太難睇，唔勞氣就假。嗱，壹淫媒多年來賣弄色情，傷風敗俗，搞到香港烏煙瘴氣，社會各界要求予以嚴懲嘅呼聲不斷，但當局就詐傻扮懵，唔單止遲遲唔肯修改使用咗廿幾年嘅《淫褻及不雅物品管制條例》，仲一再公然放生淫媒，完全當民意冇到。好喇，等到拖無可拖，當局終於承諾修改條例，可惜三年前進行咗首輪公眾諮詢，之後就好似冇咗件事咁，直到最近先至展開第二輪諮詢，仲慢過蟻躝，你話係咪做戲咁做吖。

修例歎慢板唔緊要，最離譜就係，所謂諮詢竟然隻字不提淫褻及不雅嘅定義以及評審準則呢啲備受爭議項目。正如有人話齋，既冇定義又冇準則，修例根本毫無意義。就好似踢波咁，球員冇例可循，究竟有冇犯規，點樣懲罰，一切由球證話晒事，咁仲成世界嘅。計太一叮話，當局唔止又懶又蠢，根本就係心懷鬼胎，淫褻及不雅定義不清咯喎，當局咪可以大條道理繼續玩親疏有別，一手針對正義傳媒，一手包庇淫媒囉！

話時話，如果唔係當局包庇護航，淫賤黎點可能愈淫賤愈快樂吖。係人都知，壹淫媒觸犯《淫褻及不雅物品管制條例》已經一百幾次，案底幾乎厚過電話簿，如果唔係當局放生，早就有人被罰到破產，連底褲都當埋喇。就以壹淫媒旗下嘅免費報《爽報》嚟講吖，獻世冇幾耐已經有二十幾項發布不雅物品嘅紀錄，搞到天怒人怨，人人喊打，點知影視處只係對其中十一項提出票控，每項僅罰款一萬元，你話喇，咁究竟係懲罰定鼓勵吖？

講乜都係假，如果當局唔依法辦事，揸正嚟做，就算點樣諮詢，點樣檢討，點樣修例，都係嘥氣嘅啫。歸根究柢，香港除咗要掃除官商勾結，仲要剷除官淫勾結，否則只會繼續烏煙瘴氣，永無寧日，叮！