SUN微博：打橫嚟講：給振英哥的一封信

梁振英呀梁振英，搞乜鬼只不過係一場「虛張聲勢的無聊拉布」（建制派嘅話語），就令到你進退失據，方寸大亂，成個人落晒形，要出手撰文大罵「拉布」，雖然，大家都知響硬你朵、用你真名的文章，不一定出自你親筆直書，但也不能行文詭異，邏輯混亂o架！咁，好似畀阿爺誤以為你失心瘋，逼你腳痛，咁就唔好啦！學你話齋，七百萬人嘅損失呀！

你生蝦咁跳，鬧拉布「阻住你個未來政府改組，對市民有乜好處」？我配合香港通識教育的要求，用獨立思考的逆向思維去諗，既然你決志要愛黨救港做兩屆香港特首，足有十年時間發揮你的鴻圖偉略，為何不待七一後，大權在握，喺你主場，點玩都得啦！何須急於六月三十日前全個班子歸位，講真吖，你又唔使日日咁亂打民粹牌，猛話有人阻住你派糖，累到窮人無屋住，上唔到樓，攞唔到着數，這些謊言廢話，大家笑飽的了！另外，又唔使要你孭上污名，話你愛繞過法律程序，干預立法會咁仆街呢！你知唔知呀，最近有好多人喺背後話你，你睇嗰啲人幾衰，咁唱你噃！我真替你唔抵o架！喂！箇中，有乜麻煩，屈喺個心裏面呀？不妨講畀全港市民知，大家一定樂意攞支筆一本簿擔櫈仔，你敢講，佢哋敢聽，一同出謀獻策，搞掂佢囉！

就係咁爆：荔枝山莊拆僭「欺人太甚」？

讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！

彭志銘

次文化考古學家，對城中潮語有深入研究，博徵博引，廢官廢人行埋一邊。

email：sunweibo@opg.com.hk

「就係敢爆」網址tv.on.cc/hot