政商定格：林公公煲冬瓜暗寸鬍鬚曾
財爺鬍鬚曾嘅煲冬瓜水平極為一般，早前去台灣訪問全程用廣東話發言「遮醜」，玩殘當地記者不在話下，最近有國家商務部官員來港時，鬍鬚曾又煲冬瓜，但聽過嘅人幾乎冇人完全明佢講乜。
相反政務司司長「林公公」林瑞麟尋日喺四川會見傳媒時，主動詢問大家希望佢用普通話定廣東話發言，當記者齊聲答「普通話」後，佢突然自問自答，提出如果佢答普通話，咁香港嚟嘅記者點辦，然後自言自語，話講完普通話，如有香港媒體需要佢講廣東話都可以喎！咁仲唔係暗寸爆鬍鬚曾？
林公公今次去四川成都，係出席香港支援四川地震災後重建集體項目竣工禮，除咗答記者問題外，佢都有用普通話致辭，證明呢位快將喺香港人視線暫時消失嘅人肉錄音機，播煲冬瓜都一樣得o架。
林瑞麟（左）視察工程，相信都係轉咗去普通話台。