政商定格：馮小剛成立電影公社

華誼兄弟董事長王中軍、觀瀾湖集團主席兼行政總裁朱鼎健同內地著名導演馮小剛，尋日喺北京宣布成立「觀瀾湖華誼馮小剛電影公社」，朱鼎健仲話積極考慮將觀瀾湖集團上市。

佢哋合資嘅公司會喺海南島海口市興建獨一無二嘅電影主題公園，項目將落戶觀瀾湖海口國際度假區，以馮小剛系列電影場景為建築規劃嘅藍本，會集電影旅遊、影城、酒店、餐飲、購物同文化等娛樂設施。項目將佔地一百萬平方米，建築面積五十八萬平方米，前期投資逾十億元（人民幣，下同），預計總投資約五十億元，力爭在一四年第一季度初步落成啟用。

朱鼎健話電影公社將會係一個不設門檻，冇門票嘅公社，望將文化旅遊大眾化，呢個概念會複製到中國其他城市。項目設計嘅場景包括《非誠勿擾》舒淇同葛優入住嘅鳥巢酒店、《唐山大地震》嘅落寞街道同《天下無賊》嘅經典火車景。