政壇：搞搞政：卿姐隨時變箭靶

泛民主派議員又喺度醞釀就下屆政府架構重組建議再次拉布，誓言將喺財委會問到底，而建制派亦密切監察財委會主席劉慧卿會唔會向泛民「放水」，有乜出錯就會向佢提出不信任動議，卿姐分分鐘繼曾鈺成後成為另一個箭靶。

卿姐前幾日已多次話會不偏不倚畀委員有充足發言機會，尋日佢仲重提兩年前高鐵撥款拉布一役，話運房局局長Eva鄭汝樺曾心急建議後期一次過開二十個鐘頭會，但佢就叫秘書處向議員查詢會喺會上問啲咩問題同估計每人發問所需時間，結果計出只需十二個鐘就搞掂，到最後埋單計數，前後用咗二十四個鐘，開咗十三次會議就通過撥款，佢仲好自豪話喺高鐵撥款後，Eva主動上前同佢salute（致意）。

話時話，佢之所以重提舊事，好明顯就係淆底，擔心有乜出錯而受建制派同泛民議員攻擊，甚至要面對建制派嘅不信任動議，所以擺Eva上枱打定底就真。