周松崗冇做港鐵行政總裁後，反而更加周身唔得閒，早前接手做港交所主席，尋日正式接替胡定旭做總商會主席。周松崗一當選就被傳媒追問會否擔心新特首親基層，犧牲商界利益？見慣風浪嘅佢話唔擔心，因為總商會一向都堅持同政府衷誠合作，加上政府有盈餘做利民措施，相信唔會影響到商界利益喎。
佢又話，雖然坊間有聲音希望增加利得稅回饋基層同社會，但佢認為加稅率唔代表稅收一定多咗，如果冇好嘅營商環境，稅率加到點都冇用。
總商會新主席周松崗（中）同一眾主席委員會委員尋日誕生。
