門常開變食電獸 政府總部多甩漏

上屋搬下屋，唔見一籮穀。煲呔曾急不及待將政府總部由下亞厘畢道搬去添馬艦，納稅人點止唔見一籮穀呀，直頭係對住個無底黑洞，多多公帑都唔夠填！

唔講唔知，新政府總部呢隻耗資超過五十億元興建嘅大白象，原來仲係隻食電狂魔。嗱，舊總部嘅電費開支每月平均約七十萬元，新總部由舊年十月入伙到今年三月，每月平均電費開支高達三百四十萬元，激增幾倍，就算以每平方米計算，新總部亦比舊總部耗電多過一倍，問你驚未！

燈油火蠟幾級跳，即管聽吓當局點解釋。政務司司長林瑞麟發揚九唔搭八嘅一貫作風，話新舊總部嘅面積、設施同辦公室數目唔同，用電量好難比較；又話員工啱啱遷入新址，需要工作較長時間適應環境喎。

叮！林公公分明係狡辯，嘥電就係嘥電，數字冇花冇假，點狡辯都改變唔到事實。潮流興環保，有好多措施同方法可以減少耗電，如果當局有心慳公帑，大把嘢可以做，點會搞到電費爆燈?至於員工開OT用多咗電，更加係攞嚟講，咁嘅「理由」都噏得出，林公公擺明當納稅人白癡啫！

話時話呀，美其名「門常開」嘅新政府總部，除咗「穿心煞」設計被指破壞風水，變咗「病常來」之外，更因為趕工而導致甩甩漏漏，烏龍百出，淪為「架常丟」嘅豆腐渣建築。

前排一場黃雨啫嘛，大樓從停車場到行人天橋到處漏水，堂堂衙門重地，竟然大擺「水桶陣」，乜架都丟晒啦。仲有吖，早幾日大樓東翼樓梯突然爆水管，室內「瀑布」飛流直下，持續半粒鐘，門常開變「水長流」，唔知好笑定好嬲。除咗呢啲蝦碌嘢，本報仲踢爆新總部「人常仆、磚常換」添，行人通道地磚凹凸不平，唔止令行人不便，更加係「高踭鞋OL陷阱」，焗住要重鋪，納稅人又唔見一筆。

一句到尾，新政府總部淪為國際笑柄，皆因煲呔曾好大喜功，為咗趕及喺新總部發表最後一份施政報告，搏命趕工，求其驗收，結果面子工程無面子，搞到一鑊泡。呢個政府連自己衙門都管唔掂，唔怪得將香港搞到七國咁亂喇，叮！