政壇：蜘蛛女演打戲做反派
有蜘蛛女之稱嘅包山后鄭麗莎日前出席為國際培幼會喺演藝學院舉行嘅「愛．女孩」籌款活動，同鮮魚行學校嘅同學仔合作表演詠春，有板有眼。原來佢仲躋身大銀幕做打女，齣戲會喺八月上畫，佢話喺戲中飾演反派，動作場面都唔少，雖然未係女主角，但戲份多咗已經好開心。
國際培幼會（香港）主席周文耀表示，籌款目的係全力支援內地、尼泊爾等地嘅女孩，為佢哋爭取應有嘅教育、醫療權利，杜絕人口販賣等不公平行為。大家以為香港女性享受平等待遇好幸福啦，點知做過港交所行政總裁嘅周文耀仲未滿意，話香港啲大公司高層都係男人嘅世界，女士嘅職場地位仍有待提高喎！
學咗兩年詠春嘅蜘蛛女，日前同小學生表演詠春籌款。