政壇：蔡衍明中國外來富豪榜首
胡潤尋日公布「中國外來富豪榜」，當中發現台灣富豪喺大陸賺嘅錢最多，人數佔咗成張榜單嘅57%，以五百億元（人民幣．下同）身家成為首富嘅旺旺集團董事長蔡衍明，同埋以四百五十億元家族財富排喺第二位嘅頂新國際董事長魏應交，原來都係來自台灣嘅過江龍。
蔡衍明嘅身家比舊年多咗一百億元，成功揮低魏應交，第一次坐上外來首富寶座，而來自香港、觀瀾湖嘅朱鼎健家族，以三百億元排喺第三位，身家比舊年多咗四十億元。
可能因為喺去大陸發展之前，大部分富豪都已賺咗第一桶金，所以計吓上榜嘅外來富豪，平均年齡成五十九歲，比胡潤百富榜上面大陸富豪嘅平均年齡高咗七歲，而且大陸富豪多數會喺廣東同浙江設立企業總部，但班外來富豪就對上海情有獨鍾。
旺旺集團董事長蔡衍明以五百億元人民幣身家稱冠中國外來富豪榜。（資料圖片）