政壇：搞搞政：西環袖手未祝福富貴黨選情嚴峻
經濟動力林健鋒早前搵咗十幾個區議員出席活動大晒冷後，富貴黨榮譽主席田北俊尋日又照辦煮碗，叫咗十三位鄉事派人士出嚟，當中包括四個鄉事委員會主席，佢哋都話支持田少出戰立法會新界東直選，上水鄉委會主席侯志強揚言四個鄉夾埋最少過到八千至一萬票畀田少，叫田少唔使擔心北區票源喎！
眾所周知，自從田少「白票論」一出，好多人都驚該黨被西環封殺，粉嶺鄉頭李國鳳承認撐田少確受到唔少壓力。
有政界中人透露，現時西環向外發放嘅訊息係「冇叫人唔支持富貴黨，亦冇叫人支持」，總之保持中立。不過，就算西環開綠燈，該黨選情亦好嚴峻，因為航運交通界劉健儀想轉戰港島區直選，有傳佢遲遲未搵接班人，仲可能有前黨員打對台，而紡織及製衣界亦要面臨一場硬仗，可見嚟緊九月立法會選舉，富貴黨將受幾面夾擊。
設計圖片