政壇：肥亨怕女守寡拒煙民女婿
中策集團前主席馬時亨尋日出席葵涌醫院搞嘅「無煙繪畫大賽頒獎禮」，被大會形容為重量級嘉賓，但佢上台致辭時就話自己只係「輕量級」嘉賓，皆因近排身形輕盈咗，隨即好風騷咁打開西裝褸畀觀眾用對眼驗吓佢條三十二吋纖腰，全場即嘩聲四起，相當搞笑。
跟住肥亨話吸煙本身就係個大笑話：「賣煙啲包裝都話『吸煙危害健康』，點解仲有人肯用幾十蚊買包煙嚟毒死自己咁蠢㗎？」睇起上嚟，成件事並唔符合經濟效益，佢仲好肉緊咁話戥啲煙民唔抵添！
肥亨又話叫細女拍拖千祈唔好搵煙民，除咗驚未來女婿口臭同使晒啲錢買煙外，仲怕個女後生就要守寡咁話。佢勸在場煙民要學似佢咁珍惜健康，盡快戒煙，令自己個肺快啲由黑色變做充滿新鮮空氣嘅綠色喎！
馬時亨