政壇：他信低調尖沙咀歎茶

泰國前總理他信（THAKSIN SHINAWATRA）自出走泰國政壇後，到佢妹妹英祿（YINGLUCK SHINAWATRA）掌權，至今眨眼間已五年，期間佢離鄉別井雲遊四海，間中更現身香港，生活不知幾寫意。

話口未完，尋日下午三點幾鐘，見他信同兩名男性華籍友人喺尖沙咀海港城間COVA歎下午茶，神情輕鬆。他信作風好低調，只有一位女秘書隨行，另有兩個保鏢喺門外守候。大約個幾鐘後，他信大踏步行出餐廳門口，見到記者亦大方打招呼，態度非常親切。

擬為泰國引入中國高鐵

他信話近期生活過得幾好，除開會外，仲不時旅遊度假，走勻全世界。被問到點睇目前泰國政治局勢，佢諗咗兩秒就答話覺得愈嚟愈好，睇嚟佢對妹妹嘅管治能力好有信心喎。

再問佢想唔想返泰國？佢忽然嚴肅起嚟，語氣堅定咁話：「I will go back（我一定會回去）！」但佢坦言唔知幾時先至返到去，或者係不久嘅將來喎。咁會唔會喺一年之內呢？佢再重複答話唔知道。最後他信同友人一齊登上豪華七人座駕離開，臨走前仲同記者揮手道別。

事後跟據可靠消息得知，原來他信今次嚟香港，係同中方有關方面接觸，計劃將中國嘅高鐵引入泰國，據聞路線係由曼谷通往他信嘅家鄉清邁，車程七百幾公里，目前行車時間要逾十個鐘，但以時速三百公里嘅高鐵嚟講，只需要幾個鐘，無論對當地居民抑或遊客嚟講，完全係便捷嘅交通工具，估唔到他信仍然心繫泰國嘅福祉喎。