政壇：Hea答兩電壟斷 潘潔播帶捱插

中電主席米高嘉道理前排好霸氣咁宣稱廉價電費時代經已終結，多位立法會議員尋日喺大會上，追問署理環境局局長潘潔幾時至肯研究開放電力市場，制止呢啲有恃無恐嘅言論，但係潘潔只係hea答兼耍官腔，搞到班議員慶爆喪插佢。

白鴿黨建仔齊質疑

面對中電話要加電費百分之四，潘潔話政府會繼續按《管制計劃協議》嚴謹把關，仲好淡定咁話相信兩電會吸取去年電費調整風波嘅經驗，明白到加電費要有理據，而局方亦會喺出年同兩電作中期檢討。但事實上，明明政府係將加價主導權拱手相讓兩電，兩電至可以賺到盡，激發民怨四起，令兩電知驚收回加電費計劃，好明顯冇吸取經驗嘅係政府，到依家都未知兩電有恃無恐嘅原因何在。

好多議員都話問題在於兩電壟斷市場，而開放競爭係必然之路，但潘潔又耍官腔，話按照政府同兩電○八年簽訂嘅《管制計劃協議》，政府會喺市場條件配合時，為電力市場引入競爭。不過，白鴿黨李華明就質疑，點解四年嚟政府都冇遇到「市場條件配合」做吓嘢？肥仔明黨友劉慧卿仲反問當局，係咪連開放市場主導權都交咗畀兩電，有負港人咁話？潘潔只係重申出年雙方會有中期檢討，而公眾亦可就此表達意見。

聽到呢度，就連建仔嘅劉江華都頂唔順要質疑政府嘅立場係咪有心引入競爭，點知潘潔回應話，政府唔可以單方面作決定。正當劉江華不滿回覆打算再追問之際，立法會主席曾鈺成忽然出言阻止，事關佢認為潘潔已經答咗議員問題，話：「我聽到局長話政府嘅立場就係冇立場！」潘潔聽完仲沾沾自喜咁話，政府不適宜過早表明立場，費事「窒息討論」。唉！其實佢聽唔聽得出人家係對佢失望o架？